Hyderabad: కాలేజీ బిల్డింగ్‌పై నుంచి దూకి ఇంటర్ విద్యార్థి ఆత్మహత్య
Hayathnagar Student: హైదరాబాద్ హయత్‌నగర్ పోలీసు స్టేషన్ పరిధిలోని ప్రగతి నగర్‌లో విషాదం చోటు చేసుకుంది. నీట్ కోచింగ్ తీసుకుంటున్న ఓ విద్యార్థిని కాలేజీ బిల్డింగ్‌పై నుంచి దూకి ఆత్మహత్యకు పాల్పడింది. భద్రాద్రి కొత్తగూడెంకు చెందిన విద్య ప్రియాంక అనే విద్యార్థిని ప్రగతినగర్‌లోని ఎక్సెల్ కాలేజీలో నీట్ కోచింగ్ కోసం హాస్టల్‌లో చేరింది. గత రాత్రి 10 గంటల సమయంలో బిల్డింగ్ 4వ అంతస్తు నుంచి కిందకు దూకేసింది. గమనించిన తోటి విద్యార్థులు.. కళాశాల యాజమాన్యానికి సమాచారం ఇవ్వటంతో హుటాహుటిన ఆసుపత్రికి తరలించారు. పరీక్షించిన వైద్యులు ఆమె అప్పటికే మృతి చెందినట్లు వెల్లడించారు. కళాశాల యాజమాన్యం పోలీసులకు సమాచారం ఇవ్వగా.. కేసు నమోదు చేసుకున్న పోలీసులు విచారణ చేపట్టారు. పోస్టుమార్టం నిమిత్తం మృతదేహాన్ని ఉస్మానియా ఆసుపత్రికి తరలించారు.
విద్యార్థిని సూసైడ్ నోట్ రాసి ఆత్మహత్యకు పాల్పడినట్లు సమాచారం. అయితే సూసైడ్ లేఖపై పోలీసులు నోరుమెదపటం లేదు. గోప్యంగా విచారణ చేస్తున్నారు. మరోవైపు విద్యార్థినికి మృతి ఘటనపై ఎక్సెల్ కాలేజీ యాజమాన్యం స్పందించింది. ఆమెకూ తమ కాలేజీకి ఎటువంటి సంబంధం లేదని కాలేజీ యాజమన్యం వెల్లడించింది. చనిపోయిన విద్యార్థిని చౌటుప్పల్ సమీపంలోని ఓ మెడికల్ అకాడెమీలో కోచింగ్ తీసుకుంటుందని.., ఆమెకు కేవలం ఇక్కడ ఉండేందుకు ఆకమిడేషన్ మాత్రమే ఇచ్చామని తెలిపారు. మృతురాలితో పాటు మరో ఐదుగురు విద్యార్థులు మెడికల్ అకాడెమీలో కోచింగ్ తీసుకుంటూ ఇక్కడ “ఆరుగురు విద్యార్థులు బయట కోచింగ్ తీసుకుంటున్నారు. కేవలం వాళ్లు మా దగ్గర షెల్టర్ తీసుకుంటున్నారు. విద్యార్థినికి.. మా ఎక్సెల్ జూనియర్ కళాశాలకు ఎలాంటి సంబంధం లేదు. ఇదే విషయాన్ని మేం పోలీసులకు చెప్పాం. ఆమె తల్లిదండ్రులకు కూడా విషయం చేరవేశాం. ఈ ఘటనపై విచారణ జరుగుతోంది. మానవత్వంతో ఆమెను ఆసుపత్రిలో చేర్పించాం. అయినా ప్రాణాలు దక్కలేదు. మృతురాలు పేయింగ్ గెస్ట్‌గా మాత్రమే ఉంటుంది. మా విద్యా సంస్థకు ఎటువంటి సంబంధం లేదు.” అని కళాశాల యాజమాన్యం వెల్లడించింది.
